99 litir ar fad atá sa chnuasach seo ó pheann an Athar Peadar Ó Laoghaire agus é i mbun comhfhreagrais le Séamus Ó Dubhghaill (Beirt Fhear). Clúdaíonn na litreacha tréimhse ocht mbliana déag, ó mhí Aibreáin 1899 go dtí mí an Mheithimh 1917 – tréimhse an-tábhachtach i scéal na Gaeilge agus obair Chonradh na Gaeilge faoi lánseol, An Claidheamh Soluis tagtha ar an saol agus ceisteanna teanga agus cultúir á gcur agus á bplé. Chomh maith leis na litreacha féin, tá 53 aguisín a dhéanann iarracht tagairtí a dhéantar sa chomhfhreagras a mhíniú, nó bearnaí ann a líonadh.
